Austan við Heimaklett er Klettsvík. Hægt er að ganga niður í víkina með því að fara upp Heimaklett, ganga eggjarnar í Miðkletti og fara því næst niður sandskriðurnar í Ystakletti.

Sunnan við Urðavita er Páskahraun og síðan tekur við Stakkabótin og Kópavík. Flugvöllurinn liggur ofan við Stakkabótina en frá þessu svæði er hvergi hægt að komast niður í fjöru. Sæfell og Kervíkurfjall umlykja Stakkabótina og er mikil lundabyggð í austurhlíðum Sæfells.

Sunnan við Viðlagafjöru er Urðaviti, sem áður fyrr stóð á Urðunum á austurströnd Heimaeyjar. Í gosinu árið 1973 fór vitinn undir hraun en var endurreistur á nýja hrauninu. Í tvígang hefur brotnað undan honum en vitinn sem nú stendur var byggður árið 1986. Rof við strandlengjuna er talsvert og því er vitinn nú svo úr garði gerður að hægt er að færa hann innar, eftir því sem strandlengjan rofnar frekar.

Norðurhluti Heimaeyjar samanstendur af sex klettum: Heimakletti, Klifinu og Blátindi – sem eru jafnan álitnir fegurstu útsýninsstaðir eyjunnar – auk Miðkletts, Ystakletts og Dalfjalls. Saman eru klettarnir sex kallaðir Norðurklettarnir og þeir eru elsti hluti Heimaeyjar í jarðsögulegu tilliti, eða um 40 þúsund ára. Á strandlínunni sem snýr til norðurs eru að megninu til þverhníptir hamrar með tilheyrandi fuglabjörgum og lundavarpi efst í grasi vöxnum hlíðunum.

Víkin er sendin og skjólsæl fjara sem er vinsæll útivistarstaður hjá heimamönnum. Hana er að finna vestan við flána sem tengir Stórhöfða við Heimaey. Fjaran er með svörtum hraunsandi og neðan við hana er fallegur og mikill þaraskógur.

Tilkomumikið er að ganga meðfram Ofanleitishamri en hann er norðan við Breiðabakka sem tekur við af Klaufinni. Frá hamrinum má fylgjast með sjófuglum og jafnvel háhyrningum sem eiga það til að sjást í fæðuleit vestur af Heimaey.

Húsið Landlyst er með þeim elstu í Vestmannaeyjum en það byggðu hjónin Matthías Markússon snikkari og Sólveig Pálsdóttir ljósmóðir árið 1848. Húsið gegnir merkilegu hlutverki í sögu Eyjamanna. Við það var fyrsta fæðingarstofa landsins byggð með styrk frá danska ríkinu en Sólveig hafði farið til Danmerkur og lært þar til ljósmóður. Síðarmeir var Bókasafn Vestmannaeyja til húsa í Landlyst, fyrstu níu árin eftir stofnun þess árið 1862.

Stafkirkjan í Vestmannaeyjum er glæsileg smíð en hún var gjöf frá Norðmönnum, reist í tilefni af 1000 ára kristnitökuafmæli Íslendinga árið 2000. Norðmenn vönduðu mjög til verksins við smíði hennar en í henni er hver einasta fjöl handunnin og timbrið sérvalið.

Skansinn er fjölsóttur og vinsæll meðal Vestmannaeyinga allan ársins hring og ekki að ástæðulausu, því þar útsýni einstakt og sagan alltumlykjandi. Upprunalega var Skansinn byggður í þeim tilgangi að verja dönsku konungsverslunina ágangi enskra útgerðar- og kaupmanna. Það var árið 1586.